admin

Laurdag 30. mars kl. 17 er det klart for Framnes-basar! Den solide tradisjonen byr som vanleg på god stemning med åretrekningar for små og store, andakt, song, kaker, kaffi, te og saft! Alle er hjarteleg velkomne til ei hyggeleg stund på Framnes!

Framnes hadde i dag besøk av språkprofessor Rebekah Buchanan frå Western Illinois University i USA. Ho var mellom anna innom engelsk-klassen på Framnes der ho hadde føredrag om dagsaktuelle tema i det amerikanske samfunnet. Ho hadde også føredrag for lærarstaben.

Innsyn i USA
Buchanan kom til Oslo i august i fjor i samband med utvekslingsprogrammet Fulbrigt Norge, og skal vera i Noreg i eitt år, med ei lang rekkje besøk ved norske skular, både grunnskular og i vidaregåande, på programmet. Ho snakkar med elevane om amerikansk historie, politikk, kultur og samfunn. Samstundes som norske elevar får innblikk i det amerikanske samfunnet, får dei også språkerfaring.
Engelsklærar Gry Engeseth har brukt undervisingstilbodet frå Fulbright i ei årrekkje.
– Tilbakemeldingane frå elevane tydar på at besøket har vore ein suksess, seier Engeseth.
Kombinasjonen av samfunnskunnskap, sosial kontakt og språktrening er verdfull.

Tradisjonsrikt
Fulbrigt foundation vart etablert rett etter andre verdskrigen og i 1949 vart Noreg ein del av utvekslingsprogrammet innan utdanning og kultur. Sidan starten har 1.700 amerikanarar og 4.600 nordmenn delteke i det gjensidige utvekslingsprogrammet. Kvart år får 40 nordmenn stipend for å studere, undervise eller forske i USA. På same måte får 25 amerikanarar gjere det same i Noreg, årleg.
– Eg har allereie reist landet på kryss og tvers, frå Nordkapp og Honningsvåg i nord til Kristiansand i sør, frå svenskegrensa i aust til Bergen i vest – og langs kysten. Opphaldet har vore storarta, eg elskar å reise, fortel ho.
Ho vaks opp i Minnesota, i eit område med mange norskætta amerikanarar – folk som ofte er meir glade i Noreg enn nordmenn. Buchanan bur i Illionois, der ho underviser i engelsk for lærarstudentar. Ho underviser også i profesjonell skriving. Tidlegare underviste ho ved amerikanske vidaregåande skular.
Engelskprofessoren hadde ikkje vore i Noreg før ho reiste over Atlanteren i august i fjor, saman med familien, til Oslo. Dei to borna hennar har fått intensiv språkopplæring og får no undervisning i vanleg norsk grunnskule.
Ho legg ikkje skjul på at ho har sansen for det skandinaviske sosialdemokratiet, der alle får tilgang på dei same samfunnstenestene.

Kritisk
Under møte med elevane snakka professoren om Donald Trump, nedstenginga i delar av den amerikanske administrasjonen og kampen om muren mot Mexico – og korleis dette påverkar det amerikanske samfunnet. Buchanan skildra følgjene av Trump sin innvandringspolitikk, og kva dette har å seia for mange born og unge mellom innvandrarane frå Mexico – mellom anna korleis born er blitt skilde frå foreldra sine.
– Står du i fare for å bli politisk?
– Når eg underviser på universitetet heime legg eg vekt på å vera nøytral, med tanke på at eg har studentar frå ulike trussystem og ulike politiske retningar. Her i kjenner eg meg friare – samstundes som eg prøver å få fram det som faktisk skjer i USA på ein balansert måte.
Hennar private meining er klar:
– Eg håpar USA får ny president om to år. Men sjølv med ny president, og ein ny kurs, blir det mykje å rydda opp i, ikkje minst i forhold til andre nasjonar, seier ho.

Minner om amerikansk skule
– Visste du noko om Framnes før du kom hit?
– Nei. Det viktig for meg å komme raskt i gang med reisene i Noreg for å bli kjend med dei ulike skulane. Dette er den første private internatskulen eg har besøkt så langt. Norske vidaregåande skular og highschools i USA er ulike, men etter den korte tida eg har vore her syns eg Framnes liknar litt på amerikanske skular, ikkje minst på grunn av aktivitetstilboda på fritida. Det er meir vanleg at skulane skapar fritidsaktivitetar der eg kjem frå, noko som fører til meir sosialt samvære på fritida. Det gjer at elevane vert meir kjende med kvarandre og lærer samspel, gjerne gjennom aktivitetar som for eksempel baseball. Ved mange norske skular har eg inntrykk av at elevane møter på skulen, gjennomfører skuledagen og reiser heim eller på hybel – og så skjer aktivitetane deira borte frå skulen. Det er ganske ulikt den amerikanske modellen. Samstundes er eg tilhengar av den norske skulen, som har mange positive trekk, mellom anna fleire pausar mellom undervisingsøktene. Det trur eg har noko for seg, seier ho.

Nyansar
– Kva bodskap har du med deg til elevane her på Framnes?
– Eg ynskjer først og fremst å lære dei meir om USA, og korleis samfunnet blir påverka, mellom anna av den innvandringspolitikken som vert ført no. Eg prøver også å formidla ungdomskulturen og den amerikanske populærkulturen, og at landet vårt er meir enn det ofte fjernsyn og film formidlar. Me har til dømes mange små samfunn, akkurat som her. Det er viktig for meg å få fram kor variert USA er, seier ho.

Tekst og foto: Lars Arvid Oma
 
 

I går hadde me besøk av Dag Haugeto Stang igjen. Han er på Framnes ein gong kvart semester og har seminar for Vg1 og Vg3. Temaet for seminara er «Sex og samliv» og går inn på tema som relasjonar – både i vennskap og parforhold, kommunikasjon, konflikt, frustrasjonsbeger og kjærleiksbeger, og mykje meir. Altså: ei hjelp til å kunne leve godt saman, både som vennar og som par. Takk for god og relevant undervisning!

Tekst: Jostein Moldsvor
Foto: Lisbeth F. Oma

I dag hadde folkehelsekoordinator Reidun Braut Kjosås frå Kvam herad seminar for førsteklassingane på Framnes. Ho underviste elevane i kor viktig det er med nok søvn, godt kosthald og nok aktivitet: Kort fortalt det som skal til for å gje oss god helse, og ikkje minst overskot til god læring og konsentrasjon – ikkje uvesentlege faktorar når ein går på skule eller når ein skal yta maksimalt i arbeidet.

Kjosås fekk god kontakt med elevane og serverte gode tips for korleis ein kan leggja grunnlaget for ei god helse som kan vara livet ut. Det er garantert ikkje nok med søt brus og fastfood i lengden.
Kor mykje søvn treng me, kva bør me eta for å skaffa kroppen livsviktige næringstoff, kor mykje aktivitet bør me ha i løpet av eit døgn, korleis påverkar blodsukkernivået kroppen vår, og korleis har me det, totalt sett?

Dette var noko av det Kjosås fokuserte på. Det fysiske og det mentale heng nøye saman. Det er ikkje alltid ein tenkjer over at unormale svingningar i humøret og sinnstilstanden kan ha med søvn, kosthald og aktivitet å gjera.

Mot slutten av føredraget inviterte ho elevane på ei økt med aktivitetar, og responsen var god. Med eitt var heile salen i rørsle. Det er eit godt teikn.

Tekst og foto: Lars A. Oma

2. oktober var elevar og tilsette frå Kvam vidaregåande skule og Framnes kristne vidaregåande skule samla i Framnes Arena for å høyra advokat Geir Lippestad snakka om temaet «Menneskeverd – finst det eit ytterpunkt for toleranse?»
Arrangementet var ein del av «Kvammaveko», som markerer Verdensdagen for psykisk helse gjennom ei heil veke med ulike arrangement.
Også politikarar og folk frå administrasjonen i Kvam herad deltok på føredraget.
Tilhøyrarane vart utfordra av Lippestad til å vera bevisste på kva verdiar ein står for, og at ein tek verdiane i bruk når ein vert utfordra. Han snakka på ein direkte, personleg og klar måte om rettstryggleik, menneskeverd og det å vera raus med seg sjølv og andre. Han tok utgangspunkt i utfordringar i sitt eige liv, mellom anna situasjonen då han vart spurd om å vera forsvarsadvokat i rettsaka etter terrorhandlinga 22. juli 2011. Hans eigne verdiar, synet på menneskerettar og menneskeverd vart utfordra.
Det var nærare 600 menneske i Framnes Arena, og det var tydeleg at føredragshaldaren snakka frå hjarte til hjarte.